منعيش ومننسى حالنا، الايام عم بتاخدنا من اقرب الناس النا، فجأة منوعى على خسارة حدا فيهم، اخده الموت.

منعيش ومننسى حالنا، الايام عم بتاخدنا من اقرب الناس النا، فجأة منوعى على خسارة حدا فيهم، اخده الموت.

جملة منقولها وحرفياً منصدقها لانه الموت حرمنا من شوفة اقرب الناس النا.
بس لنكون واقعيين، الحياة كل يوم بتاخدنا منن، الشغل، المسؤوليات، الوقت بيمضى بسرعة وما منعطي اهلنا حقن بوقتنا. مننشغل ومنقول بعد شوي بشوفن، بقعد معن، والشوي بتصير بالساعات والايام، وبيجي اليوم يلي بروحوا ومنتمنى نشوفن بشي حلم، من بعد ما كانوا بوجنا كل يوم. ضامنين وجودن مع انه منعرف انه الموت ما الو وقت، بس ما منصدق رهبة الموت الا لنعيشها.
اختربت مشاعر الفقد مرتين، مرة بخيي ومرة ب بابا، والله يباركلي بعمرها ل ماما، بس فكرة انه ح يجي هاليوم واختبر شعور فقد ماما، صعب!
بوفاة خيي وبابا كنت اهرب من زعلي وحزني بالدرس والامتحانات، لضل قوية ومتماسكة كرمال اخواتي وماما، انه لازم حدا يضل قوي ليساند الكل ورغم انه ما كان مطلوب مني هالدور بس كنت اتطوع واعمله ولما اطمن عالكل انه الفترة الصعبة قطعت عليهن وصاروا مناح، كنت اسمح لنفسي احزن، انزوي، وحس بمرارة الفقد.
الحياة ما بتوقف عند حدا، حتى عند اهلنا، بتوقف شوي، بس بتستمر بطعم مختلف.
والقوة بتجي من هالشعور، لما تختبر شعور الفقد بأقرب الناس الك، اقسى من هيك احساس شو ممكن عيش اوحس؟؟ هون فهمت انه القوة بتيجي من الفقد. يعني طالما قدرت كمل حياتي بعد وفاة خيي وبابا يعني انا بقدر اتخطى ايا صعوبة، ايا وجع. وايا حزن قدام حزني عليهم هو اخف بكتير، برمي ابتسامة ساخرة عاللحظة يلي بعيشها وبكمل حياتي.
اشبعوا من اهلكم ومن اقرب للناس الكم، احفظوا ملامحهم وريحتن، عبروا عن حبكن الهم، قبل ما يجي يوم وتتمنوا لو يرجع فيكن الزمن لورا يوم واحد بس لتعوضوا كل لحظة راحت وما كنتوا فيها معن.
قصتي اليوم حزينة، لانه الحزن شعور متله متل الحماس والفرح، موجود فينا وبأثر فينا بعمق وبيترك فينا ندبات بتبقى معلمي فينا حتى آخر العمر!